يوم في حياة عضو

اولها انا كدة يا ندى
ماشى يا ستى
شوفوا بقى انا فى رمضان ببدأ اليوم بصلاة الفجر وبعدين برجع انام واصحى عالساعة 10 او 11 اقوم افتح المنتدى اشوف ايه الجديد واطمن عالناس اللى فيه والحكاية دى مبتخدش ربع ساعة وبعدين بقوم وادخل التواليت اعمل زى الناس واتوضى وانزل اصلى الظهر واقعد شوية مع صحابى يا اما فى الجامع او يا اما فى بيت جدة واحد صاحبى الله يرحمها متوفية والبيت فاضى فبنروح نقعد هناك كلنا
لغاية قبل العصر بساعة بنروح يا اما نريح شوية او عن نفسى بقعد عالجهاز شوية ابحر فى بحر المعلومات واقرا الجرايد واشوف الدنيا فيها ايه لغاية ما العصر يأدن بقوم اصلى واروح على البيت بتاع جدة صاحبى اللى قولتلكم عليه عشان بعد العصر كلنا بنبقى هناك عشان بنقوم بتمارين كدة وقبل المغرب بشوية بنقوم رايحين نتوضى ومتجمعين فى الجامع نصلى ونروح على بيوتنا نفطر ويادوب نفطر ونغسل ونقوم قايمين متوضيين ورايحين نصلى العشا والتراويح مع د/ابراهيم الشربينى ممكن تكونوا عارفينه ده معروف اوى بنخلص عالساعة 11 عشان كدة اغلب الوقت مبصليش معاهم وبصلى فى مسجد تانى بيخلص الساعة 10 وبروح اقعد شوية عالجهاز لغاية السحور او ممكن اكون راجع تعبان فبنام علطول واتسحر واناااااااااااااااااااااااااااام
ده فى يوم من ايام رمضان
تعالى بقى ليوم عادىفى الجامعة مثلا
بنزل عالجامعة اول ما اقرب من الجامعة واجى اخش اقول ربنا يطلعنا منك على خير
واجى اخش واعمل نفسى برم ومطلعش الكارنيه ويجى العسكرى عم احمد يقولى فين كارنيهك اقوله يا عم احمد لسه محفظتنيش دنا معيد معاكم هنا بقالى عمر برضه يصمم عالكارنيه واطلعه وانا مضايق واخش برضه افضل انفخ وياسلام بقى على الشباب المستجدين فى الجامعة يعنى اللى اول سنة ليهم تلاقيهم بقى زاحمين الدنيا والجنانين مليانة عالأخر فاكرين نفسهم فى دريم بارك زى ما كنت بعمل تمام وكالعادة بنات تجارة مبيكلموش ولاد نهائى لأنهم ولاد وحشين اما بنات كلية الكعب العالى اللى كان اسمها كلية الأداب فدى بقى بناتها زى السكر تروح تقعد بس تلاقى بنات قمامير بيعزموك ويظبطوك
انا بقى بدخل المحاضرة ويا سلام لو الدكتور دخل قبلى مبخشش المحاضرة لأنى لو فاتنى حاجة من المحاضرة يبقى مش هفهمها
وبعدين بحب اقعد ورا مع نفسى ومبكلمش حد ولا ولاد ولا بنات بخلص المحاضرة الأولى وانزل على الكافيتريا اشوف صحابى نتجمع نفضل نضحك شوية وان كنا هنفطر مع العلم انى مبحبش افطر ونديها خلعان لأنى عن نفسى مبطقش اقعد فى الجامعة غير اول سنة مكنتش بروح غير الساعة 3 او 4 وكمان على الرغم اننا عندنا محضرات من الساعة 7 ل 9
ام هند بخلص الجامعة وبرجع منها عالساعة 1 بالكتير ارجع انام شوية وبعدين اقوم على صوت واحد صاحبى بينده يا إسلام وانا افضل انده عليه من عالسرير واقوله اطلع وميسمعنيش لازم اقومله واقوله انى صحيت والبس وانزل يا اما ننزل البلد او نفضل قاعدين فى الشارع تحت او ممكن نروح كافيتريا وخاصة لو فيه ماتش ونخلص ونرجع اسهر عالكمبيوتر لحد الصباح الباكر

هى دى حياتى عارف انها مش منظمة بس اعمل ايه ساعات والله بظبطها بس فى الغالب هيا ملخبطة


يلا بقى يا ندى انتى اللى عليكى الدووووووووور

ايام سعيده ان شاء الله يااسلام
لما نشوف ندى بتعمل ايه
ياله ياندى مستيينيين

مشكور اسلام و محمد على مروركم


خليني في الاخر اسلام

يكون يومي اتظبط شوية

اختار واحد تاني مؤقتاً

سورى مافيناش من الهروب ياندى

بقا كده

يعني انا اتدبست

ماشي يا اسلام انت و محمد

امري لله

انا في اليوم العادي اللي هو قبل رمضان بقوم من النوم بدري اخد شاور طبعا مش بصلي الصبح لاني بكون صليت الفجر و اتصل بصاحبتي اقوللها البسي تقوللي هنروح فين اقوللها اي حته و نلبس يا اما نروح النادي يا المكتبة يا نخرج نشتري هدوم المهم نخرج و ممكن نتغدا بره و بعدين نرجع اشوف ماما لو عايزه حاجه مني و بصراحه احيانا بتصمم اني اعمل الحاجه قبل ما انزل
المهم بعدين بعد شويه على النت بس بصراحه الشويه بتوعي بيبقو كتير و بعدين انام بس اكيد بكون صليت كل الفروض في وقتها
ده بيبقا يومي العادي
و محدش يقوللي مش بتدخلي المطبخ
انا مش بدخله لاني خايفه عليهم

اما بقا في رمضان اللي هما اليومين دول
بنام الساعة 8 الصبح بعد اما اكون صليت الفجر
و اقوم على بعد الظهر ماما تقوللي صباح الخير يا هانم اقولها صباح الخير يا حبيبتي " اخدتها في الكلام علشان عايزين يومنا يعدي اصلي الظهر و اشوف لو ماما عايزه حاجه مني اعملهالها يكون العصر ادن اصليه و اقرا شويه قرآن
اخلص اخويا الصغير يمسك فيا
تعالي اتفرجي على الكارتون ده علشان خاطري
يابني انا مش عايزه اتفرج عيه انا حافظاه و شوفته مرتين قبل كده
علشان خاطري تعالي تعالي
حاضر
و يحكيلي بقا التفاصيل
انت يا بني انا هتفرج ولا هسمعك
حاضر
و بعد شويه هيحصل كذا و كذا
و انا ببقا مستحمله و اهرب منه اقولله هروح احضر الفطار مع ماما
احضر الفطار
و قبل المغرب بشويه
اخويا الصغير يمسكلنا الساعه
ناقص 17 دقيقه
كل يوم يبقو 17 لا بيزيدو ولا بيقلو
المهم الحمد لله ادن
نفطر
و احتمال اقوم البس و انزل اصلي التراويح على حسب الغزالة
و لما اجي بقا اعد على النت كتييييييييير
هما طبعا يناموا و انا قاعده بشوف منتدايا و منتدى اسلام و منتديات تانيه مشتركة فيها
و اقوم قبل السحور
احضرلهم السحور
و اصحيهم
و يتسحرو
و يصلو الفجر و يكملو نوم
انا بقا مش جايلي نوم
بعد اما اتفرج على التلفزيون
او اتصل على اصحابي ارخم عليهم و اصحيهم علشان يقومو يصلو
المهم بتتقضى
و على 7 او 8 بنااااام
بس
ده يومي في رمضان

اما بقا في الدراسة
فأنا طالبه مستجدة في كليه الكعب العالي على رأي اسلام باشا اللي هرانا تريقه
ومش عارفه هيكون ازاي
بس يتهيالي
اني هصحى اخد شاور و البس و قبل مانزل ماما تقوللي افطري اقوللها لا تقوللي هتنزلي كده اقوللها اه و مالو هو يعني هيقول لا
انزل و اروح على الكلية و اتمشى في الجامعة " دريم بارك يا اسلام " و اشوف فين محاضراتي و اقضي اليوم انا و اصحابي
بس

تعرفو يا جماعه الموضوع ده خلاني الاحظ ان بجد حياتي ملغبطة
انا يعتبر مش بعمل حاجه في حياتي
ياللا انا هختار
0
0
0
0
0
0
0
0
0
مـــــــــــــــــــحــــــــــــــــــــــــــمــــــــــــــــــــــــــــد

احنا متفقناش على كده
انا اللى فيها يعنى ماشى
احم احم
نتكلم بقى
انا فى اليوم العادى اولا كل ايامى شبه بعضها
بس الاختلاف بيبقى فى رمضان فى اليوم العادى بقضيه كالتالى ................اولا بصحى من النوم حوالى الساعه8 بروح المعرض (معرض سيراميك بتاعنا ) بفضل فيه لاخر النهار طبعا بيبقى يوم رخم
كله شغل شغل مفيش شتيمه بس الحمد لله بصلى فى الجامع لانه جنب المعرض وبرجع اكمل شغل لحد اخر النهار بنقفل وبروح اتعشى ده لو اتعشيت يعنى لانى فى الغالب مبتعشاش بخرج مع صحابى شويه نتمشى حوالى 7 كيلو علشان معانا واحد عاوز يخس ومعزبنى انا معاه اقوله ياعم انا مالى يقولى الصاحب ليه ايه عند صاحبه ايه اقوله عشوه ومزه وخروجه يقولى لا عشوه وتحسيسه وتمشيه المهم بنخلص مش بروح النت اقعدلحد ما ابقى بنام وانا قاعد اروح اخد مينى شاور وانام

اما ايام الدراسه فكانت احلى ايام فى حياتى كنت بقضيها بقى سفر وكده كنت بصحى من النوم الساعه7 اركب القطر واسافر اوصل عند المعهد الاقى صحابى مستنينى اسلم عليهم ونروح نقعد فى الكافيتريا شويه لحد ميعاد المحاضرات ماييجى نروح نحضر ونرخم على الدكاتره لحد مايكرشونا من المحاضره ننزل نكمل اللى كنا بنعمله فى الكافيتريا وبعد مانخلص نتمشى شويه لحد ميعاد القطر بتاعى اعذبهم معايا لحد مايوصلونى ويرجعو هم اوصل البيت هلكان اتعشى واناااااااااااااااام

اما فى ايام رمضان بقى الايام الجميله اللى احنا فيها دى بنام بعد الفجر واقوم الساعه 9 اروح المعرض ماليش دعوه بالشغل اقعد اقرا قرأن لحد الظهر مابصدق اقوم سايب المعرض لانى ببقى مخنوق من القعده اروح الجامع اصلى واخد راحتى وارجع اقعد لحد العصر بروح اصلى وارجع اكمل قرأن لحد فبل المغرب بساعه ونص بروح البيت اجهز ميه ساقعه وتمر علشان بنروح نفطر بيهم ناس مسافريين على الطريق بروح اصلى المغرب وبعد كده اروح افطر وبعدين اصلى العشاء والتراويح وبخرج اقعد على النت لحد الفجر
بس انشاء الله ادعولى هيتغير النظام ده لانى هعمل مشروع لنفسى صغير على قدى يارب يسهل
بس انا كده خلصت
المفروض اختار بقى
ياله ياهدهد
ياله ياحبيبتى متستخبيش انتى اللى عليكى الدووووووووور
مستنيين
اااه ميرسى على الموضوع ياندى

ههههههههههههههههههه ايه دة انا بتدبس بس ماشى
انا فى الايام العادية بصحى من النوم على الساعة 2 وبعد كدة بعد على النت وافتح الايميل والمنتدى وبعد كدة بقوم واتكلم فى التليفون اشوف حخرج ولا لا لو حخرج يبقى بحضر نفسى وارتب حوار كدة علشان ماما توافق انى اخرج ولو مش حخرج يبقى بتفرج على التليفزيون او اعد اتكلم فى التليفون او اعد ارغى مع اختى وبعد كدة بنام الصبح على 6 او 7
ايام رمضان بقى بصحى من النوم الساعة 3 او 3.30 واعد على الكمبيوتر اشوف المنتدى واكلم اصحابى على الايميل وبعد كدة افطر وانزل اصلى فى الجامع او ممكن يوم كدة انزل مع اصحابى وبرجع على الساعة 11 افتح الايميل والمنتدى واشوف الاخبار واتفرج على المسلسل بتاع بنت من الزمن دة وبعد كدة بتسحر الساعة 2.30 وبعد كدة اعد اشرب وبعد كدة ادخل الاوضة اتكلم مع اى حد فى التليفون واعد ارغى بعد كدة مع اختى وبعد كدة ننام على الساعة 6 او 7 الصبح
ايام المدرسة بقى بنام على الساعة 1 او 12 واصحى الساعة 7 او 7.15 وانزل الساعة 8 الا ربع واعدى على اصحابى بتجمع كلنا ونتمشى شوية وندخل المدرسة الساعة 9 وساعات اروح اعد عند صحبتى فى البيت ونروح المدرسة الساعة 9 الا ربع وانا فى المدرسة مهمة جدا محدش بيتكلم معايا بقولهم كنت نايمة وكدة ولما بابا بيجى المدرسة لانه معاهم فى المدرسة بيقولولوا بيسالنى بقولوا كنت بنحرف مع اصحابى بيضحك ويقولى متتكررش تانى بس هو بيكلم مين بقى المهم بخلص المدرسة الساعة 2 يا اما بخرج الساعة يا اما بخرج الساعة 2 يا اما بستنى المدرسة تفضى وبخرج الساعة 2.30 وبعد كدة بنتمشى انا واصحابى ولو عندى درس بروح البيت على طول علشان استحمى وبعد كدة انزل الدرس وارجع منه احط المزكرات على المكتب واعد على الكمبيوتر ومش بذاكر غير اخر شهر بس وبفلح فى الاخر معرفش ازاى
بس بقى هيا دى ايامى كلها ملل عادى

ايه الايام اللذيذه اللى احنا بنعيشها
اللى محدش فينا قال انو بيروح الشركه الصبح وبعد الظهر بيبقى عنده اجتماع مجلس اداره وبليل عشاء عمل
وانه فى ايام بيسافر لندن يشوف فرع الشركه هناك
ايه الملل اللى احنا فيه ده
ياساااااااااااااااااااااااااااااااااااااااااتر

على رايك والله دى ايام كلها ملل اوىىىىىىىىىىىىىىى

مش مملة ولا حاجة يا جماعة هيا دى حياتنا يمكن منكنش راضيين عنها ويمكن كمان تكون مش عجبانا واكيد مش عجبانا وحتى لو بقينا رؤساء مجالس إدارة يا محمد
لازم نستحمل الحياة حياتنا ولازم نتأقلم عليها
تقدر تقولى اللى بيسافر لندن ده مبتوحشوش مصر ويبقى عايز ينزل النهاردة قبل بكرة رغم ان طبعا حياته هناك مش هتبقى مملة
بس سبحان الله ربنا رزقنا بأحلى حاجة فى حياتنا الحب بس الحب فى الله اللى من غير مصالح ولا نفاق وبيندرج تحته الحب للمكان والبلد اللى انت اتربيت فيه وكمان القناعة والرضا وده فعلا كنز والله يا جكماعة والله كنز وعن تجربة
الحياة حلوة بس الجنة احلى واخر كلامى الللى زهقكم انا عارف ياريت كلنا نحاول نقرب من ربنا عشان نلاقى الجنة فى الأخر

مشكورين على مروركم

احنا اللي بايدينا نغير حياتنا

بس احنا كسلانين حتى نحاول

انا حاولت كتير بس هيا مش بتتغير معايا